في حدث فلكي لن يتكرر قريبًا، يوم 2 أغسطس 2027 هتختفي الشمس تمامًا عن 9 دول عربية، ويتحول النهار إلى ليل في مشهد مهيب!
الحدث النادر ده هو الكسوف الكلي للشمس اللي العلماء أطلقوا عليه كسوف القرن أو كسوف الأقصر 2027، وبيعتبر الأطول خلال قرنين كاملين، حيث ستغيب الشمس في مدينة الأقصر لمدة 6 دقائق و22 ثانية!
في هذا المقال من سلسلة العلم بالملعقة، بنقدملك دليل شامل لظاهرة كسوف 2027 —
من المدن اللي هتشهد الظلام الكامل، زي الأقصر ومكة وصنعاء وبوصاصو،
إلى أخطر التحذيرات الطبية ونصائح السلامة أثناء المشاهدة.
هتعرف كمان شكل السماء وقت الكسوف، والكواكب اللي هتظهر بعينك المجردة في عز النهار،
وكيف تستعد للنظر بأمان باستخدام نظارات الكسوف المعتمدة.
استعد لتجربة بصرية لن تتكرر إلا مرة واحدة في العمر!
☀️ كسوف القرن 2027: ليلة مظلمة في عز النهار
إن شاء الله فى يوم 2 أغسطس 2027 الشمس هتختفى! وساعتها النهار فجأة هيتحول لليل فى 9 دول على مستوى العالم، أو بلغة علماء الفلك هيحصل كسوف كلى للشمس هيؤدى لاختفاءها.
والمفارقة بقى ان الكسوف ده نشن تماماً على منطقتنا العربية، وتحديداً على السعودية واليمن والسودان والصومال، ومعاهم شمال أفريقيا كله: مصر وليبيا وتونس والجزائر والمغرب. بل المذهل إن مصر وتحديداً مدينة الأقصر، هتكون أكتر الأماكن فى الكوكب تأثراً بالظاهرة، لدرجة إن الفلكيين أطلقوا على الكسوف الشرس ده كسوف القرن أو كسوف الأقصر 2027.
طبعاً الظاهرة النادرة دى هتكون مهيبة بشكل مذهل، وحرفياً هتخلى الناس تشوف الكواكب والنجوم فى عز الضهر. وعلى الرغم من ان الكلام ده بيعتبر تجربة بصرية ملهاش مثيل، إلا إنها برضه تجربة فى منتهى الخطورة ولازم الكل يكون فاهم هيتعامل معاها إزاى. فرجاء فعلاً تركز كويس انهاردة لأن الموضوع مش بسيط.
انهاردة إن شاء الله قناتنا هتعمل سبق عبارة عن دليل متكامل للظاهرة دى. هنتكلم عن كل المدن اللى هتختفى فيها الشمس، وهنتخيل مع بعض شكل السما وإيه اللى هنشوفه وهنشوفه إزاى؟ وطبعاً مش هننسى نقولكم على نصائح المشاهدة وتعاليم السلامة.
🥇 ليه كسوف الشمس الكلي سنة 2027 فريد من نوعه؟
أولاً كسوف الشمس هو حدث سماوى مهيب بيحصل لما يمر القمر بين الأرض والشمس، وهو ظاهرة بتحكمها قوانين الفيزياء وبالتالى بنقدر نتوقعه و نوصفه، يعنى بنقدر نعرف نوع الكسوف وميعاده وأماكن حدوثه.
فالكسوف زى ما انتوا عارفين بيبقى نوعين رئيسيين: الكسوف الجزئى والكسوف الكلى.
الكسوف الجزئى بيحصل لما القمر يحجب جزء من ضوء الشمس عن الأرض، وساعتها بتبان الشمس كأنها متآكلة وجزء منها مضيئ والجزء التانى مظلم.
أما الكسوف الكلى والمرتبط بمقالنا انهاردة، فهو اللى بيحصل لما القمر يحجب قرص الشمس بالكامل عن الأرض، وساعتها فجأة بيتحول النهار لليل وفعلاً بتظهر النجوم. وهو ده اللى هنشوفه بعنينا لو كان لينا عمر بإذن الله بعد أقل من سنتين.
وهمه 9 دول اللى هيحصل فيهم الكسوف الكلى. بقية الدول وعددهم أربعين تقريباً هتبان الظاهرة عندهم على صورة كسوف جزئى. وبصفة عامة الكسوف الكلى حدث نادر وغالباً اللى بيشوفه بتبقى مرة فى العمر.
لكن بقى تحديداً كسوف 2027 بيتميز ببعض المواصفات الفريدة والخاصة جدا:
أولاً زى ما قلنا إن الكسوف ده نشن بالظبط على الدول العربية. وبالمناسبة خلينى أوضحلك حاجة فى الحتة دى عشان الدقة مش أكتر: لو شفت الموضوع ده فى مصادر أجنبية خصوصاً اليومين الجايين لما تنتشر الأخبار هتلاقيهم بيقولوا ان عدد الدول اللى هيحصل فيها الكسوف الكلى 12 دولة مش 9. والسبب فى كده إنهم أولاً مدخلين إسبانيا فى الحسبة، وده على الرغم من إن المدن الإسبانية اللى هيظهر فيها الكسوف هى مدن عربية أو إسلامية بالأساس، زى مثلاً مدن سبتة ومليلة المغربية. لكن بطريقتهم لو ضفنا إسبانيا يبقى كده 10 دول. ثانياً بالنسبة للدول 11 و 12، فلو جاملناهم يبقى بالكتير نعتبرهم دولة واحدة، والسبب انهم مدخلين منطقتين حكم ذاتى تابعين للتاج البريطانى، المنطقة الاولى هى مجموعة جزر فى المحيط الهندى، والمنطقة التانية هى جبل طارق. وغير إن جبل طارق اسمها لوحده قايل كل شيئ، فأصلاً من المتوقع ان المشاهدة فيها تتأثر بسبب بعض الظروف الجوية. لكن لو هنعمل زيهم ونعد جزر المحيط الهندى وجبل طارق كأنهم دول مستقلة، يبقى كده احنا وصلنا فعلاً لـ 12 دولة على مستوى العالم هيحصل فيها الكسوف الكلى.
عموماً خلينا نرجع للخصائص المميزة والنادرة لكسوف 2027. الكسوف ده زى ما شفت هيكون يوم 2 أغسطس فى عز الصيف. وده وقت فى المنطقة العربية السما بتكون صافية والشمس فى منتهى الوضوح، وده بيساهم فى الشعور بقوة الظاهرة للحد الأقصى. فتصور مثلاً ان الكسوف الكلى يحصل فى وقت الغيوم أصلاً مالية السما، أو تصور انه يحصل فوق المحيط أو فوق الصحارى بعيد عن الناس. وعلى فكرة ده اللى فى الغالب كان بيحصل قبل كده. يعنى الخلاصة كسوف 2 أغسطس 2027 جاى فى توقيت مثالى للمراقبة.
ده غير بقى الميزة الإضافية وهى مدته القياسية. فالكسوف ده هو الأطول خلال قرنين من الزمان تقريباً.
ومتهيألى محدش فهم جملة اختفاء الشمس على انها مش هتطلع تانى. لو حد فهم كده وقاعد مخضوض ياريت يتطمن وما يقلقش. فـالكسوف ده اللى بيعتبر الأطول على مدار قرنين، وفى المكان اللى هيشهد أطول فترة زمنية وهى مدينة الأقصر المصرية، هيستمر غياب الشمس بالظبط (6 دقائق و 22 ثانية). وبكده يبقى الكلام برضه له معنى تانى: مش كل الدول هيحصل فيها الكسوف، سواء بقى الكسوف الكلى أو الجزئى.
فخلينا دلوقتى نركز مع أهم المدن اللى هتشهد الحدث بكل عنفوانه.
🗺️ مواقع كسوف الشمس الكلي 2027 (خريطة الدول العربية)
بالنسبة لمصر فـالقاهرة الكبرى والدلتا والإسكندرية مش هيشوفوا إلا الكسوف الجزئى. أما الكسوف الكلى فهيكون بكل قوته على مدن ومحافظات الجنوب وأكترهم الأقصر، ودى اللى بتعتبر صاحبة الرقم القياسى فى مدة غياب الشمس وهى (6 دقائق و 22 ثانية).
لكن برضه هنلاقى مجموعة من أقوى المدن السياحية مش هتقل كتير عن الأقصر، زى مثلاً أسوان والغردقة ومرسى علم وحتى واحة سيوة. أسوان والغردقة ومرسى علم هيستمر الكسوف فيهم تقريباً 6 دقائق و 15 ثانية. أما واحة سيوة فهـيستمر 5 دقائق و 30 ثانية. والكلام ده برضه له معنى كبير خاص بالعوائد السياحية، فربنا يسهل والأوضاع تكون مناسبة عشان 2027 فعلاً منتظر انها تحقق أرقام قياسية.
لكن لو بصينا بقى على السعودية هنلاقى ان بعض مدنها برضه هتشهد الكسوف الكلى، زى مثلاً مكة المكرمة وجدة والطائف وخَمِيس مُشيْط. وخَمِيس مُشيْط دى هتكون صاحبة الرقم القياسى لمدة غياب الشمس بين مدن السعودية بـ 6 دقائق بالظبط. أما فى مكة فهـيستمر الكسوف لمدة 5 دقايق و 14 ثانية.
اليمن برضه هتشهد بعض مدنه التاريخية الكسوف بكل قوته، زى مثلاً صنعاء وتعز وعدن. أكتر المدن اللى هيستمر فيها غياب الشمس هى صنعاء، لكن هيكون وقت أقل عبارة عن دقيقتين و 25 ثانية من الظلام فى عز النهار.
لو روحنا لجيراننا السودانيين فهنلاقى مدن فيها أرقام مميزة، فمن أول وادي حلفا لحد دنقلا هتكون مدة غياب الشمس 6 دقائق كاملين. لكن بقية المدن الرئيسية زى الخرطوم وأم درمان وغيرهم هيكون كسوف جزئى.
تحت السودان هيشارك اخوانا الصوماليين فى حفلة الكسوف الكلى بأهم موانيهم: المدينة الصومالية الشهيرة بوصاصو (Bosaso )، ودى هيستمر غياب الشمس فيها 4 دقائق وثانيتين.
لو روحنا بقى لجيراننا فى الغرب فى الجماهيرية الليبية، هنلاقيهم برضه بيشاركوا بأهم موانيهم بنى غازى، واللى هيكون فيها أطول مدة كسوف بـ 6 دقائق و 10 ثوانى.
بعد ليبيا على طول هنوصل لـتونس الخضرا، ومدن الكسوف الكلى هتكون صفاقس والقصرين وقفصة وحومة السوق والقيروان. وأطول كسوف هيكون فى عاصمة الجنوب صفاقس بـ 5 دقايق و 41 ثانية.
لما تعدى من تونس هتوصل لـمحاربى الجزائر، والجزائر هتحصل فيها حاجة مميزة شوية، وهى إن بعض الأماكن زى قسنطينة وبومرداس هيحصل فيها كسوف جزئى أشبه بالكلى، فالشمس فى قسنطينة والناصرية هتختفى بنسبة تتعدى الـ 99 %. أما الكسوف الكلى بنسبة 100 % فهيكون فى وهران وولاية المسيلة، وهـيسجل 5 دقايق و 23 ثانية.
ولما نوصل بقى للبوابة الغربية فى المغرب، هنلاقى عدد من المدن السياحية الجميلة هتشارك فى الأمسية النهارية! أهم المدن هى طنجة ومراكش وأغادير ومدينة وجدة على الحدود مع الجزائر. وهتكون أقصى مدة للكسوف الكلي هى 4 دقائق و 51 ثانية في طنجة.
برضه من باب العلم بالشيئ الكسوف الكلى هيحصل فى جبل طارق لمدة 4 دقايق و 28 ثانية. وفى مدينة سبتة هيوصل لـ 4 دقائق و 49 ثانية. أما أكتر زمن للكسوف فى أقاليم ما وراء البحار البريطانية فى المحيط الهندى، فهيكون 3 دقائق و 28 ثانية.
⚠️ مخاطر وتحذيرات ونصائح السلامة
أنا عايزك بقى تركز معايا كويس فى الجزء ده من المقال. مبدئياً وباختصار الأشعة الشمسية ضارة لأنها بتشتمل على الأشعة تحت الحمراء والأشعة فوق البنفسجية. وطبعاً الأشعة دى ضارة على كل حاجة فى الجسم. بس بما اننا بنتكلم عن ظاهرة الكسوف فهنركز على الأضرار اللى بتحصل للعيون.
المشكلة إن ضرر الأشعة الشمسية على العين بيبقى أكبر وقت الكسوف، وده مش عشان حاجة فى الأشعة نفسها، لكن تحديداً عشان أنت بيزيد وقت تحملك انك تركز مع الشمس. فى الأيام العادية أنت مش بتقدر تركز مع الشمس حتى لو حاولت.
والمشكلة إن شبكية العين (Retina) حساسة جداً وفى نفس الوقت مفيهاش مستقبلات للألم. يعني لو حصل ضرر مش هتحس بيه في لحظتها. فلو بصيت للشمس فى حالة الكسوف ولو لمدة ثوانى، للأسف وبصورة مؤكدة هتحرق بعض الخلايا العصبية. والكلام ده هيؤدى لمشاكل كتير، بتبدأ من تشويش الرؤية أو ظهور نقط عميا أو تغير في الألوان، وبتوصل للتلف الدائم فى شبكية العين وفقدان البصر. وعلى فكرة النوعية دى من الأمراض واللى بتعرف بـاعتلال الشبكية الشمسى أو الـ Solar Retinopathy تم اكتشافه مع بدايات القرن الـ 19 بعد كسوفات شمسية فعلاً.
وعشان تتقى المشاكل دى لازم تكون مستعد بـنظارات معينة خاصة بالكسوف. انسى خالص قصة نضارة الشمس بتاعتك حتى لو ماركة عالمية ومعمولة من الدهب. نضارة الشمس العادية دى كارثة أكبر من العين المجردة، لأنها ببساطة بتخدع العين عن طريق تقليل أشعة الضوء المرئى. فـنضارة الشمس مصنوعة أصلاً لـتعتيم الأشعة الضوئية المرئية. والمشكلة أساساً مش فى أشعة الضوء المرئى، لكن فى الأشعة تحت الحمراء والأشعة فوق البنفسجية. فأنت لما تلبس نضارة تضلملك الدنيا اكتر ما هى مضلمة فى الكسوف، هتفضل باصص للشمس أكتر.
أما النضارات الخاصة بالكسوف فـبتبقى مصنوعة من مواد معينة، واختصاراً بتبقى عبارة عن طبقات من الفلاتر والمرشحات، واللى بتقدر تمنع الأشعة تحت الحمراء والأشعة فوق البنفسجية. وبتكون النوعية دى من الفلاتر زى بالظبط اللى بتستخدم مع التلسكوبات. بس خلى بالك برضه مش أى تلسكوب تشوفه تروح ماسكه ومراقب الشمس بيه، فأنواع كتير من التلسكوبات مش بيكون متركب فيها النوعية دى من الفلاتر.
المهم ان النظارات الآمنة دى بتكون مخصصة للكسوف واسمها فعلاً الـ (Eclipse Glasses). وبصرف النظر عن ماركتها لازم تكون مطابقة للمواصفات الدولية، والكلام ده بتعرفه لما تشوف الرمز ده (ISO 12312-2). دي العلامة اللي لازم تدور عليها قبل ما تشتريها لو نويت.
وللعلم النضارات دى أسعارها مش مبالغ فيها على الاطلاق، يعنى بتكون أرخص حتى من نضارات الشمس التقليدية. وعندنا فى مصر ممكن فعلاً تلاقى حاجة فى حدود الـ 100 جنيه. وأسهل مكان تجيب منه هو موقع أمازون أو طبعاً محلات النضارات الكبيرة. المشكلة بس فى أمازون انه غالباً بيبيع طقم كامل، يعنى غالباً هتلاقى 5 نضارات مع بعض أو حتى عشرة، لأنه بيعتبر إن اللى هيشترى هياخد للأسرة كلها، وده طبعاً بيرفع السعر ويخلى البعض يتخض. فلما مثلاً تلاقي إعلان بيقول: “Solar Eclipse Glasses – Pack of 5” والسعر ألف جنيه، فده معناه انهم 5 نضارات وكل واحدة بـ 200. فالخلاصة لو هتشترى من أمازون اعمل حسابك بقى مع الأسرة أو الأصدقاء.
أخيراً بقى هقولك حاجة كنت متردد انى أقولها أصلاً، لأن فعلاً الموضوع مفيش فيه هزار ومش عايز اتحمل نتيجة أى حد يفهم الكلام الغلط. لكن برضه للأمانة العلمية هشاورلك عليها من بعيد عشان أخلى مسئوليتى. .. هيبقى موجود دقائق معينة هيحددها علماء الفلك وطبعاً هتنقلها وسائل الإعلام. الدقائق دى هتسمح ليك انك تبص على الشمس وقت الكسوف من غير نضارات. فلو تابعت الأخبار وعرفت التحذيرات وأخدت الوقت الآمن بالثانية، ممكن وعلى مسئوليتك انك تبص على منظر السما المبهر من غير قلق.
🔭 إيه اللي ممكن تلاحظه في السماء؟
الحقيقة أنه فى وقت الكسوف الكلى مش بتبقى برضه الدنيا عبارة عن ظلام دامس. والسبب هو وجود التاج الشمسي أو الكرونا (Corona) أو الإكليل أو الهالة أو أياً كان الاسم اللى تعرفه بيه.. المهم انه بيكون موجود وبيزود جمال المنظر. لكنه فى نفس الوقت بيضيئ إضاءة ضعيفة، وده بيخلى السما لونها حاجة كده زى أزرق غامق أو رمادي.
بس على فكرة الحيوانات بتتخدع وبتفتكر ان الليل جه فعلاً، وهتشوف بنفسك الطيور وهى بترجع لأعشاشها وتستعد للنوم.
بالنسبة بقى للأجرام اللى هتظهر فى السما:
فأول حاجة مضمونة هى كوكب الزهرة.
بعديه على طول بيبان المشترى كأنه نجم جديد أول مرة تشوفه.
وممكن برضه لو كنت فى مكان مناسب بعيد عن التلوث الضوئى والبيئى تشوف زحل.
ده غير إن عطارد وارد جدا انه يظهر، وده فى حد ذاته بيعتبر حدث لهواة مراقبة الأجرام الفلكية، لان فى الأيام العادية بيبقى صعب جداً رصد عطارد لقربه من الشمس.
كمان لو معاك تلسكوب صغير أو أى آداة تقريب بسيطة ممكن تشوف المريخ.
وعلى فكرة كل الكواكب دى انت بتشوفها على هيئة نجوم. لكن النجوم الحقيقية اللى هتظهر هتكون مجموعة معروفة بـالهيكساجون الشتوي (Winter Hexagon)، ودى مجموعة بتضم نجوم زي الشعرى اليمانية (Sirius) وقلب الأسد (Regulus) وRigel وغيرهم.
ومتهيألى كفاية لحد كده عشان لو مخطط تعيش لحظات حلوة ما أحرقلكش اليوم. بس ما تنساش انى أول واحد دليتك على الروعة دى.
🎁 بونص: ندرة الظاهرة والتاريخ القادم
حكاية ان كسوف كلى يتخطى الـ 6 دقائق ده يعتبر فعلاً حادث نادر وفريد من نوعه. فزمن الكسوف بيطول فى ظروف نادرة بتحتاج تموضوعات معينة للأرض والقمر والشمس:
فلما مثلاً يكون القمر فى الحضيض بالنسبة للأرض Perigee، بيبان ان شكله أكبر وبالتالى بيغطي الشمس فترة أطول.
ولو برضه الأرض فى الأوج Aphelion بالنسبة للشمس، ده بيساعد أكتر ان الكسوف يبقى أطول.
كمان لو كان المكان اللي بيتقاطع فيه مسار القمر والشمس قرب خط الاستواء، فنتيجة لسرعة دوران الأرض بتبقى مدة الكسوف أطول.
المعلومة التانية اللى ممكن تهمك ان أول كسوف كلى بالطول ده بعد كسوف 2027 هيكون سنة 2114. يعنى على بلاطة كده لو الكسوف ده عداك مش هتتكرر الفرصة.
يا ترى مين بقى اتحمس وهيبدأ يسأل عن مكان وأسعار النضارات؟
