هارفارد تصدم العالم و تحذر من سفينة تجسس فضائية تابعة لحضارة ذكية وقريبة من الارض!

👽 تحذير هارفارد: مركبة تجسس فضائية على أعتاب الأرض؟

تفتكر لو تأكدنا ان فى مخلوقات فضائية جاى تزورنا قريب… هل دى تبقى حاجة حلوة ولا وحشة؟ هل فى اعتقادك إن الزوار دول هيكونوا أخيار ولا أشرار؟ يعنى هل هيكونوا حضارة مسالمة نتبادل معاهم الخبرات ونحل ألغاز الكون؟ ولا هيكونوا مجموعة من الغزاة عايزين يستولوا على الموارد الأرضية؟

الحقيقة يا صديقى الأسئلة اللى من النوع ده لو وجهتها لغير المتخصصين هتلاقيهم بيقولولك ان الاحتمالين واردين: ممكن تكون حضارة مسالمة ونتعاون معاها، وممكن تكون حضارة عدائية جاية تدمرنا. لكن يا صديقى الإجابة دى وان كانت تبان شكلاً انها منطقية، إلا انها من وجهة النظر العلمية خاطئة تماماً. فللأسف إحتمال إن الزوار الأجانب دول يكونوا مسالمين هو احتمال معدوم تقريباً. وهتبانلك الأسباب أول ما ندخل فى التفاصيل. أنا بس كنت مؤقتاً عايز أقولك على رأى الباحثين عشان ما تكونش حسن النية!

غالباً هتقولى طب يا عم عمدة متشكرين! لما يبقى ييجوا الفضائيين هنبقى عارفين انهم مش طيبين! إيه بقى لازمة الكلام ده دلوقتى؟ انت شايف الفضائيين يعنى واقفين على الباب؟

للأسف يا صديقى إن هى دى المشكلة! فى يوم 16 يوليو اللى فات، وبناءاً على تقرير مقدم من علماء من جامعة هارفارد، بعتت مراكز الإنذار الفضائى للجهات المسئولة تحذير بيقول: إنه من المحتمل يكون تم الكشف عن مركبة فضائية لجواسيس غير أرضيين.

🌳 فرضية الغابة المظلمة (The Dark Forest)

الحقيقة ان فكرة الزوار الفضائيين لازم هيكونوا أشرار، دى فكرة تقدر تقول انه مجمع عليها من كل العلوم. علماء التاريخ والاجتماع والدين وكل العلوم الإنسانية… بل وحتى علماء الحيوان، الجميع بيؤكد إن تلاقى الحضارات مش ممكن أبداً ينجو من الصراع.

علماء الدين بيقولوا إن الصراع ده حتمى لانه واحدة من سنن التدافع. والباحثين فى باقى العلوم الإنسانية بيؤكدوا على نفس الفكرة، الفكرة اللى بتسمى قاعدة صراع الحضارات. فالباحثين بيقولوا انه أينما وجدت المصالح والموارد.. لازم يتوجد الصراع.

حتى علماء الفيزيا نفسهم زى الراحل Stephen Hawking له مقولة شهيرة جداً، بيقول اننا لو قابلنا فعلاً سكان الكواكب الأخرى، فهيحصل زى اللى حصل لما اتقابل سكان العالم القديم مع سكان العالم الجديد، ولازم هيؤدى اللقاء ده لفناء واحدة من الحضارتين. يعنى زى ما حصل من صراع بين الرجل الأوروبى الأبيض و السكان الأصليين أوالهنود الحمر.

فالأدلة على موضوع صراع الحضارات ده ملهاش حصر تقريباً، لدرجة إن علماء الفضاء عندهم بالفعل عدد من الفرضيات عن شكل الصراع، بل وعندهم كمان السيناريوهات اللى بسببها الصراع ده مؤجل حالياً، زى مثلاً فرضية الغابة المظلمة (Dark Forest Hypothesis).

الفرضية دى نشأت أساساً كواحدة من الحلول لـمفارقة فيرمى الشهيرة: أين الجميع؟ وبسرعة كده لو حد مش عارف مفارقة فيرمى (Fermi paradox)، فهى عبارة عن سؤال منسوب للفيزيائى الحائز على نوبل إنريكو فيرمي. والسؤال بيقول هو فين سكان الفضاء والكواكب التانية؟ فالسؤال مبنى أصلاً على أساس إن سكان الفضاء موجودين بالفعل، ومينفعش إحصائياً انهم ما يكونوش موجودين. فالمجرة بتاعتنا واللى هى مجرد نقطة فى بحر المجرات الموجود فى الكون، إحصائياً ممكن يكون فيها لوحدها 100 مليون حضارة فضائية! قدام العدد الكبير ده من الحضارات فيرمى بيسأل همه الجميع راحوا فين؟ ليه ما قابلناش الفضائيين لحد دلوقتى؟

أما فرضية الغابة المظلمة دى فبتقوله ان الجميع عارفين اللى فيها فـمستخبيين! يعنى أى حضارة ذكية بتبقى عارفة إن اللقاء لازم يؤدى للصراع، وكمان عارفين إن الكون فيه أعداد لا تحصى من الحضارات، وميضمنوش ان حضارة تانية تكون متطورة عنهم وتؤدى لفناءهم. فبالتالى القرار انهم يفضلوا مستخبيين أحسن. وكل الحضارات الذكية بتفكر بنفس الطريقة وبالتالى الكل بيخفى نفسه. فبيكون الحال أشبه بـغابة مليانة بكل انواع الكائنات لكنها مظلمة، محدش فيها شايف التانى.

🏛️ موثوقية الخبر: وزن جامعة هارفارد و آفي لوب

فى المقدمة أنا قلتلك إن فى تحذير من وجود جسم فضائى غريب بالقرب من الأرض، وقلتلك انه بناءاً على تقرير مقدم من علماء من جامعة Harvard. الجسم ده بيشتبه انه سفينة تجسس من الفضائيين.

بس إحتياطى لو حد موصلوش يعنى إيه جامعة هارفارد، فخلينى أقوله إن الجامعة دى هى أحسن وأهم جامعة فى العالم.. و الأسباب لكده مش هينفع نعدها. بس خلينى برضه أقولك على كام مثال:

1. أولاً Harvard هى الجامعة اللى بتحتكر سنوياً المركز الأول فى تصنيف أفضل الجامعات.

2. ثانياً هى أقدم وأهم مؤسسة للتعليم العالي في أمريكا.

3. ثالثاً هى أكتر جامعة بتتلقى الدعم بالمليارات للحفاظ على مستوى التعليم فيها.

4. رابعاً هى أكتر جامعة قدمت عدد من الخريجين اللى فازوا بـجوائز نوبل.

5. خامساً هى أكتر جامعة خرج منها رؤساء أمريكيين وأعضاء الكونجرس.

وانا ممكن أفضل طول المقال أكلمك عن سمعة الجامعة دى وموثوقيتها، إنما متهيألى المعنى وصل. العلماء والأساتذة فى هارفارد مش بيقولوا أى كلام. أى ممثل لهارفارد لازم الكلمة عنده تبقى بحساب. ولذلك لما أقولك إن 3 علماء من هارفارد قدموا تقرير عن احتمالية رصد سفينة تجسس لفضائيين، لازم تعرف انه مش عنوان للإثارة من بتوع الصحف والمجلات.

ده غير بقى إن موضوع الفضائيين ده بيعتبر فعلاً من أهم وأخطر المواضيع، وده على عكس ما ممكن حد يكون فاكر انه من اختراع السينما و روايات الخيال العلمى. فالموضوع ده معموله كل الإجراءات الجادة اللى ممكن تتخيلها. يكفى بس إنى أقولك إن الأمم المتحدة عندها مكتب خاص لشئون الفضاء الخارجى.

والمفاجأة بقى ان Avi Loeb (آفي لوب) قائد فريق هارفارد الثلاثى اللى قدم التحذير، هو نفسه الرئيس الحالى وواحد المؤسسين لأهم مشاريع البحث عن الكائنات الفضائية. المشروع التابع لناسا والمعروف بـمشروع جاليليو (Galileo Project)، واللى مقره فى مركز هارفارد سميثسونيان للفيزياء الفلكية.

ومتهيألى بعد اللى قلتهولك عن جامعة هارفارد، هيبقى كافى لتوضيح قيمة Avi Loeb وآراؤه. إنما بالمرة خلينى أرفعلك الموثوقية وأقولك إن Avi Loeb مش أستاذ عادى فى هارفارد: ده كمان هو الرئيس السابق لقسم علم الفلك فى الجامعة فى الفترة (2011-2020)، ورئيس سابق لمجلس الفيزياء والفلك التابع للأكاديميات الوطنية، وعضو في المجلس الاستشاري لرئيس أمريكا لشئون الفضاء. وزى ما كان ممكن أضيع المقال فى توضيح قيمة جامعة هارفارد، فممكن أضيعها برضه فى المسميات الوظيفية اللى شغلها Avi Loeb.

فمتهيألى بعد الفرشة دى اللى بتعبر عن درجة موثوقية الموضوع، كان لازم نتكلم عن الموضوع ده وما نعتبروش موضوع خاص بقنوات الخيال العلمى.

☄️ تقرير عن الزائر 3I/ATLAS والسلوك غير المألوف

بداية كل شيئ كانت مع رصد الجرم ده عن طريق تلسكوب ATLAS التابع لوكالة ناسا. وللعلم المرصد ده موجود فى دولة شيلى، وهو جزء من نظام التنبيه الأخير لاصطدام الكويكبات بالأرض.

وكانت الانطباعات الأولى عن الجرم الفضائى هو أسلوب ملاحه الغريب. ده غير طبعاً الملاحظة الأهم وهى انه ظهر فجأة من العدم فى النظام الشمسى، يعنى جرم محدش أبداً رصده قبل كده. وكان الاعتقاد انه نوع من أنواع المذنبات، خصوصاً مع ديل الأبخرة الشهير اللى بيشبه دخان المحركات النفاثة.

والمشكلة بقى إن الجرم ده موجود على مسار بيقربه من المدار الأرضى. ولذلك آخر مساهمات مرصد Atlas كانت تسمية الجرم بـ 3I/ATLAS. بعدها تم إبلاغ المراكز الفلكية للمشاركة فى المعلومات. ومع وصول الموضوع لناسا، تم انتداب فريق علمى من هارفارد لدراسة الجرم وتقديم تقرير شامل. الفريق اللى هيقوده عالم الفيزياء الفلكية Avi Loeb.

وعشان نختصر خلينا ندخل على طول فى أهم اللى جه فى التقرير:

1. أولاً تم التأكيد على إن الجرم 3I/ATLAS نشأ فعلاً خارج النظام الشمسى. وبكده يبقى فعلاً هو جاى فى زيارة محدودة، يعنى يا دوب هيعبر النظام الشمسى ويختفى فى أعماق الكون.

2. واستكمل التقرير ملاحظاته بالمعلومات عن الخصائص الرئيسية، فقال مثلاً إن الجرم عرضه حوالى 12 ميل يعنى حوالى 19 كلم. وقال انه بيتحرك بسرعة 37 ميل في الثانية أو 60 كلم فى الثانية. وقال ان الحركة دى أسرع بمرتين من أي صاروخ من صنع الإنسان.

3. لكن الشيئ الإيجابى ان 3I/ATLAS مش بيشكل أى تهديد للأرض من حيث الاصطدام. فأقصى قرب ليه هيكون فى الفترة ما بين 29 أكتوبر إلى 31 أكتوبر 2026. وهيكون ساعتها على بعد 130 مليون ميل أو 209 مليون كلم.

أما العبارات المقلقة فى التقرير ده اللى اتقدم فى 16 يوليو اللى فات، فبدأت لما اتقال ان سلوك الجرم ده غير مألوف تماماً بالنسبة لمذنب. فهو مش بيتشابه مع سلوك صخرة عشوائية وصلت لنظامنا الشمسي بالصدفة، و بيبدو كأنه بيمتلك محرك تكنولوجى وبيتم توجيهه بذكاء!

وهقولك جملة اتقالت فى التقرير عديها مؤقتاً وهنرجعلها كمان شوية: اتقال ان 3I/ATLAS أعاد للأذهان الشك اللى زرعه Oumuamua.

وختم Avi Loeb و Adam Hibberd و Adam Crowl تقريرهم ببرجراف مهم مكتوب فيه: “إن كل الرهانات غير مضمونة، يجب أن نضع جميع الاحتمالات نصب أعيننا حتى نحصل على الأدلة والبيانات التي ستُخبرنا بماهيته. لكن حتى ذلك الوقت فعلى العالم أن يستعد، وعلى صانعي السياسات أن يقررون كيفية الاستجابة لذلك“.

👽 أومواموا (Oumuamua) وموجة الزيارات

احنا اتكلمنا فعلاً هنا فى القناة عن Oumuamua. لكن كملخص سريع Oumuamua برضه جرم غريب زائر من خارج المجموعة الشمسية، كان ظهر فى سنة 2017 وأثار الجدل بشكل كبير. والبعض برضه شك انه يكون مركبة تجسس فضائية. و كلمة Oumuamua نفسها هى كلمة من لغة محلية فى هاواى معناها الجاسوس أو الكشاف أو الرسول. وبرضه كان بيتحرك بشكل غير مسبوق تقريباً. بس الفرق بقى إنه كان أول جرم من النوعية دى يتم تسجيله فى التاريخ.

لكن بعد مغادرة Oumuamua المجموعة الشمسية بسنتين بالظبط، رصد الفلكيين للمرة التانية فى التاريخ جرم جديد زائر برضه للنظام الشمسى. بس الجرم ده الفلكيين تأكدوا فيما بعد إنه فعلاً مذنب طبيعى، لكن برضه خرج البعض بفرضية بتقول إن المذنب ده اللى أطلقوا عليه اسم Borisov هو أيوه مذنب طبيعى لكن وارد إنه يكون موجه عن طريق حضارة ذكية.

والمهم إننا دلوقتى فى سنة 2025 مع 3I/ATLAS، بنكتشف للمرة التالتة خلال 8 سنين حالة عبور للزوار الأجانب. فهل من الممكن إن الحكاية دى تكون مجرد صدفة؟ هل الكون قرر فجأة كده انه يبعتلنا أجرام جديدة للمجموعة الشمسية؟ ولا الأوقع إنها تكون مراكب تجسسية بتجمع معلومات؟

🔭 الموقف حالياً: تكليف جونو (Juno) لحسم اللغز

زى ما لاحظت يا صديقى إن الموضوع ما فاتش عليه حتى شهر، وواضح إن اليومين الجايين هيكون فيهم معلومات أكتر. وطبعاً هنتابعها معاكوا إن شاء الله.

لكن فى أحدث لقاء لـ Avi Loeb من حوالى أسبوع على قناة WBZ-TV، قال إنه مش بيستبعد استخدام الكائنات الفضائية لمراكب فضاء شبيهه بالأجرام الطبيعية، بل حتى مش بيستبعد قدرة الكائنات دى على تعديل الصخور الطبيعية واستخدامها كمركبات فضاء.

وقال انه حالياً بيتم التركيز على رصد أى شذوذات للكويكبات والمذنبات الموجودة فى المجموعة الشمسية. وقال انه قدم اقتراح لـاستخدام مركبة جونو (Juno) الفضائية، واللى حالياً بتدور حوالين كوكب المشترى لاستكشاف 3I/ATLAS. وده لانه هيمر على مسافة 53.6 مليون كيلومتر من المشترى فى 16 مارس الجاى.

وقال انه أخد تأييد على الاقتراح من عضوة الكونغرس Anna Paulina Luna. وأكد انهم بيعملوا كل حاجة عشان يكونوا مستعدين تحسباً لأي مفاجآت. وختم كلامه بإنه تم تكليفه بقيادة المراصد التلاتة فى ماساتشوستس وبنسلفانيا ونيفادا لحسم طبيعة 3I/ATLAS.

يا ترى بقى انتوا رأيكوا إيه؟ هل تفتكروا انه مذنب عادى والأفورة دى كلها مجرد اجراءات احترازية مش أكتر؟ ولا ممكن تحصل المفاجأة ويكون مركب تجسس فعلاً من حضارة ذكية؟