ميكانيكا الكم البيولوجية والوعي: لماذا يبدو الكون صممًا لأجلنا, وكيف يشكل وعيك واقعك؟! 

🤯 الوعي كشريك: هل نحن نساهم في تشكيل واقع الكون؟

هل إحنا مجرد مراقبين سلبيين في الكون، ولا إحنا شركاء فعليين في تكوينه؟

في عمق ميكانيكا الكم، مكان ما بتتشابك المادة والمعلومة، بنكتشف إن وجودنا الواعي مش بيقتصر على مجرد الملاحظة، إنما بيتعدى ده، لحد ما ندرك إنه قوة فاعلة بتشكل نسيج الواقع ذات نفسه. الوعي البيولوجي، اللي بنشوفه داخل أجسامنا وأدمغتنا، ممكن يكون المفتاح اللي بيربط بين الوجود والمادة، بين الحياة والكون.

ويمكن ما يكونش الكون كيان مستقل عننا، إنما هو نتاج متبادل لحضورنا وإدراكنا، حضور بيخلي الكون ده يظهر بالصورة اللي نعرفها ديه. والكلام اللي بقوله ده مش مجرد تأمل فلسفي، إنما هو نقطة التقاء ميكانيكا الكم مع البيولوجيا، المكان اللي بتتشابك فيه قوانين الكم مع شبكات الحياة في معادلة عميقة من الوعي والوجود.

في المقال ديه هنغوض سوا في رحلة لقلب العلاقة الغامضة ديه، علشان نفهم إزاي ممكن لوعينا إن يكون أكتر من مجرد تفاعل داخلي، وإزاي إنه ممكن يكون وجودنا هو شرط لظهور الكون بالشكل اللي نعرفه. فهل يا ترى إحنا صُنّاع الواقع ولا مجرد مخلوقات داخل كون كبير؟

👁️ من يراقب من؟ (المراقب كعامل فاعل)

لما بنرفع عيوننا لفوق ونبص للسماء في ليلة صافية، أول حاجة بنشوفها هي وجود لوحة كونية هادية بتتكون من نجوم بتلمع في أعماق بعيدة في الفضاء، إلى جانب مجرات بتدور في صمت، يعني أكنه فضاء ممتد بلا نهاية… وكإن المشهد ده كان هناك من الأزل، لا بيتغير ولا بيحصله حاجة.

ولكن في قلب ميكانيكا الكم، في سؤال بيزلزل الصورة الهادية ديه عن تصورنا للكون والفضاء الخارجي: وهي إنه هل يا ترى الكون كان شكله هيفضل كده بالهداوة ديه… لو ما كناش موجودين هنا جواه وبنتأمله؟

هتقولي إنت بتهرج يا عمدة ولا إيه. هقولك اصبر عليا يا صديقي، منا أكيد متابع كل مقالات ميكانيكا الكم وبقيت فاهم كفاية إنه في العالم الكمي، المشاهدة ليها دورها بشكل كبير في رسم الصورة اللي عقولنا بتشوفها. فمثلاً في عالم الكم الإلكترون ما بيحددش موقعه إلا لما نيجي نقيسه. وكذلك الفوتون ما بيقررش مساره إلا لما نيجي نرصده. وكإن الطبيعة منتظرة حضرتك وحضرتي اللي هو المراقب يعني، علشان ييجي ويختار شكلها ومصيرها.

فـ يا ترى إيه اللي هيحصل لو كان القانون العجيب ده مش مقتصر فقط على الجسيمات الصغيرة؟ هيحصل إيه لو إن وجودنا البيولوجي، بوعينا وإدراكنا، هو اللي بيرسم للكون ملامحه اللي بنشوفها اليوم؟

وبرجع بقولك ديه مش هلوسة ولا قصايد رومانسية عن علاقة الإنسان بالكون. إنما هي فكرة بتدق باب العلم بشكل مباشر: فماذا لو لم يكن المراقب مجرد مشاهد، بل شريك أساسي في صناعة النتيجة النهائية؟

ومن هنا يا صديقي بتبدأ قصة المبدأ الأنثروبي، النظرية اللي بتقول إن الكون مضبوط بدقة متناهية بتسمح بظهور الحياة. لكن السؤال الأجرأ هو: هل ديه مجرد صدفة كونية سعيدة… ولا حياتنا نفسها شرط أساسي لوجود الكون زي ما نعرفه؟

🎯 كون مضبوط على مقاس الحياة: المبدأ الأنثروبي

ولما بنيجي نتأمل في قوانين الكون وثوابته الفيزيائية، بنلاقي إن كل رقم، وكل قيمة مضبوطة بدقة مذهلة.

فمثلاً قوة الجاذبية: على سبيل المثال لو تغيّرت بمقدار ضئيل جداً، ما كانش هيبقا مسموح لتشكيل النجوم والمجرات. وعلى الجانب الأخر لو كانت كتلة الإلكترون أكبر أو أصغر شوية، كانت وقتها هتنهار الكيمياء اللي نعرفها، وما كانش هتكون الجزيئات اللي بتبني الحياة موجودة. ده حتى سرعة تمدد الكون بعد الانفجار العظيم كانت ضمن نطاق ضيق جدًا، بحيث لو تجاوزته كان الكون هيبقى إما كرة نارية متفجرة أو فراغ ميت متجمد.

وهنا بيظهر المبدأ الأنثروبي، علشان يأكدلنا على حقيقة إن الكون اللي بنشوفه ما هواش مجرد نتيجة عشوائية، إنما ده نتيجة مضبوطة بطريقة بتسمح بوجود الحياة.

وبيتخذ المبدأ ده شكلين أساسيين:

1. النسخة الضعيفة (Weak Anthropic Principle): بتقول إننا بنعيش في كون ملائم لإننا لو ما كناش كده، فوقتها مش هنكون موجودين علشان نسأل السؤال ده أصلاً.

2. أما النسخة القوية (Strong Anthropic Principle): فبتقول إن الكون لازم يمتلك خصائص محددة تتيح وجود مراقبين واعين؛ وكإن وجودنا مش مجرد نتيجة ثانوية، إنما شرط أساسي في صياغة الواقع.

والفكرة ديه بتجبرنا لطرح تساؤل فلسفي وعلمي في نفس الوقت: وهو، هل الكون مضبوط بالطريقة ديه من باب المصادفة النادرة؟ ولا وجود الحياة ووجودنا إحنا كمراقبين هو جزء من آلية صياغة قوانين الكون نفسه؟

وبعض العلماء بيروح لزاوية أبعد من كده ويروح مستند على نظريات زي الأكوان المتعددة، لإن بيكون فيها عدد هائل من الأكوان اللي فيها قوانين مختلفة، فبالتالي ما ينفعش نلاقي نفسنا في الكون، إلا اللي بتتوافق قوانينه مع الحياة، بينما على الجانب الأخر بيطرح علماء تانيين فرضيات زي الانتقاء الكوني (Cosmological Natural Selection)، اللي بتقول إن الأكوان اللي بتنتج أكبر عدد من الثقوب السوداء هي اللي بتتكاثر بشكل أكتر، ويمكن تكون الحياة جزء من الدورة الكونية ديه.

وبالمعنى ده، ممكن ما يكونش الكون بيئة محايدة ظهرت فيها الحياة بالصدفة، إنما ملعب مُهيّأ خصيصًا أو حتى مُتأثر بوجود الحياة ذاتها.

🧬 ميكانيكا الكم والمراقب: الوعي البيولوجي كعامل فاعل

ولو جينا للعلم الحديث زي ميكانيكا الكم، فهنلاقي إنه بيكشف عن حقيقة إنه الوعي والمراقبة مش مقتصرين على كونهم ظواهر جانبية للكون، إنما ممكن يكون ليهم دور مركزي في تشكيل الواقع ذاته.

ففي التجارب الكمومية، لما ما بيتمش مراقبة الجسيمات، بتفضل في حالة تراكب غير محددة، أما بمجرد الملاحظة فبتتحدد حالة واحدة واضحة. وده بيشير لفكره إن المراقب مش متفرج سلبي إنما جزء فاعل في تكوين الواقع.

لكن إيه اللي هيحصل لو امتد المفهوم ده علشان يشمل الكون كله؟ فهل ممكن إنه يكون وجودنا ككائنات واعية، مش كمجرد نتائج ثانوية لكون غير واعي، إنما كشركاء في صنع واقع الكون ده؟ وهل إحنا بوعينا بنساهم بشكل مباشر في اختيار حالة الكون، وبنحكم على ملامحه ومصيره؟

أهو السؤال ده بياخدنا لشيء ممكن نسميه بـالوعي البيولوجي كعامل فاعل، لما بيبقى الوعي اللي بيملكه الكائن الحي أكتر من مجرد إدراك داخلي، إنما هو لاعب رئيسي في صياغة نسيج الواقع.

ولو كان الكون والوعي في حوار مستمر، فوجودنا مش مقتصر على المشاهدة، إنما هو مشاركة نشطة، بيعيد فيها تشكيل بنية الكون في كل لحظة إدراك. وانا ما بقصدش فقط الوعي البشري، إنما أقصد كل نظام بيولوجي واعي، وده اللي بدوره بيوسع مفهوم “المراقب” علشان يشمل منظومات الحياة بأكملها.

فبالتالي، مش هيكون وجود الحياة في الكون حدث عشوائي أو ناتج فقط عن ظروف فيزيائية، إنما هو جزء ما بيتجزأش من آلية الكون في التبلور والتطور. وهنا بنلمس نقطة محورية بتربط بين البيولوجيا والفيزياء الكمومية، المكان اللي ما نقدرش نفصل فيه حياة المراقب عن الواقع الكوني، لإن هما الإتنين مترابطين في شبكة معقدة من التفاعلات والمعلومات.

🧠 الوعي البيولوجي مفتاح للواقع (فرضية الأنابيب الدقيقة)

ومن هنا ننتقل لسؤال أكتر تعمق: وهو إزاي ممكن للوعي البيولوجي، وتحديدًا وعينا الإنساني، إن يكون ليه تأثير ملموس في العملية الكمومية الكونية ديه؟

هنلاقي الإجابة تكمن في طرح ميكانيكا الكم البيولوجية لفرضية إن الوعي مش بينشأ فقط من التفاعلات الكيميائية العصبية التقليدية في الدماغ، إنما بيعتمد على عمليات كمومية دقيقة بتحصل داخل الخلايا العصبية، خصوصاً في هياكل دقيقة بتسمى “الأنابيب الدقيقة” (microtubules).

والعلماء أمثال روجر بنروز وستيوارت هامر أوف، اقترحوا إن العمليات الكمومية ديه بتسمح للدماغ بمعالجة المعلومات بشكل متفوق، بيتجاوز حدود الفيزياء الكلاسيكية. ولو صحت الفرضية ديه، فوقتها وعينا ما هواش مجرد نتاج عشوائي لتشابكات كيميائية، إنما هو عملية كمومية متطورة بتتيح لينا اختيار أو “تثبيت” نسخ معينة من الواقع من بين عدة احتمالات.

وبكده هيكون الوعي قوة فاعلة، قادرة على التأثير في نسيج الواقع، ومش فقط مراقب سلبي. وده بيوسع مفهوم المراقب في ميكانيكا الكم البيولوجية من كونه مجرد مشاهد لكونه صانع للواقع، قادر ينخرط في حوار مستمر مع الكون، وبكده بتتداخل العمليات الحيوية مع العمليات الكمومية على مستويات متعددة.

وبكده نقدر نقول إننا أول حد في اليوتيوب يتكلم عن البيولوجيا والفيزياء الكمومية ويربطهم في نسيج واحد، لإن زي ما شفنا ما نقدرش نفصل الحياة الواعية عن الواقع الكوني، لإنهم وجهين لعملة واحدة، بيشتغلوا مع بعض في شبكة معقدة من التفاعلات والمعلومات.

🌌 هل نحن السبب في أن الكون يبدو بهذه الطريقة؟ (الارتجاع الزمني)

وبعد ما تعمقنا في فهم دور الوعي البيولوجي كمشارك فاعل في تشكيل الواقع، بنوصل لتساؤل أكتر جرأة وتأمل: وهل ممكن يكون وجودنا إحنا، كمراقبين واعين، السبب الأساسي اللي بيخلي الكون يظهر بالصورة اللي بنشوفها؟

وهل الماضي الكوني نفسه أو الأحداث اللي شكلت الكون ده، تم اختيارها أو “تثبيتها” جزئياً بفضل وجودنا في الحاضر؟

وانا عارف إن الفكرة تبان غريبة، لكنها مش بعيدة عن أطر الفيزياء الحديثة، خاصةً اللي بتتعامل مع ظواهر زي “الارتجاع الزمني” (Retrocausality)، لما بيكون للحاضر تأثير على الماضي، ومش العكس فقط زي ما كنا بنعتقد تقليدياً. ففي ميكانيكا الكم، مليان فرضيات وتجارب بتشير لنتائج القياس أو الملاحظة اللي بتؤثر على الحالات السابقة للجسيمات، وده بيفتح الباب قدام فكرة إن وجود المراقب أو الوعي ممكن يكون ليه دور في “اختيار” مسار التاريخ الكوني.

ومن المنطلق ده، بنقدر نفكر في الكون كأنه نظام حي ومرن، بيكون فيه الحاضر والمستقبل متفاعلين مع الماضي، ووجودنا الواعي في الحاضر مش ممكن يكون مجرد مصادفة، إنما جزء من آلية الكون نفسه. وده بيوصلنا لتصور جديد: وهو إن وجودنا مش مجرد نتيجة نهائية لعمليات كونية ماضية، إنما إحنا برضه شركاء في صياغة العمليات زي واقعنا، تاريخنا، وحتى بنية الكون يمكن إنها تكون منبثقة جزئياً من وعينا الجماعي والفردي.

🌠 إسقاطات كونية: من المبدأ الأنثروبي إلى الأكوان المتعددة

أما العلماء اللي معتقدين بـالأكوان المتعددة، واللى هي فرضية بتقول إن الكون اللي بنعيش فيه هو واحد من بين عدد هائل من الأكوان، كل منها بيملك قوانينه الفيزيائية الخاصة بيه، وثوابته المختلفة. وفي السيناريو ده، المعروف بـ نظرية الأكوان المتعددة (Multiverse Theory)، من الطبيعي إننا نلاقي نفسنا في الكون اللي ربنا خلقه بحيث يكون صُنع أو “اُختير” بحيث يكون صالح لوجود الحياة.

والتصور ده بيعزز النسخة القوية من المبدأ الأنثروبي، وده لإن مش فقط كوننا مضبوط لوجودنا، إنما يمكن وجودنا إحنا هو اللي “اختار” الكون ده من بين كل الأكوان الممكنة.

وتفكير زي ده بيفتح الباب قدام احتمالية إن تكون الحياة والوعي، مش نتاج ثانوي لقوانين ثابتة، إنما عوامل أساسية بتؤثر وبتتفاعل مع البناء الكوني ذاته. فهل إحنا فقط مجرد مشاهِدين للكون، ولا مبدعين من خلال وعينا؟

بالإضافة لكل ده، هنلاقي فرضية الانتقاء الكوني (Cosmological Natural Selection) اللي بيقترحها عالم الفيزياء لي سمولينسكي، واللي بتقول إن الأكوان اللي بتنتج ثقوبًا سوداء أكتر بتتكاثر بشكل أفضل، وممكن تكون الحياة جزء من العملية الكونية المستمرة ديه.

وباختصار، كل الأفكار ديه بتوضح لينا إن وجودنا البيولوجي ووعينا يمكن هما أكتر من مجرد نتاج، إنما ممكن يكونوا محركات أساسية في تشكيل الكون زي ما بنشوفه.

❓ من يصنع من؟ (الخاتمة)

ولما بنوصل لنهاية النقاش المعمق ده، بيفضل موجود السؤال الأزلي اللي بيحيط بفلسفة وجودنا وواقعنا: والسؤال هو: من يصنع من؟ هل نحن أبناء الكون فقط، أم أننا صانعوه بوعينا وإدراكنا وبإرادة الله عزوجل؟

وزي ما شوفت يا صديقي، إزاي حقيقة وجودنا الواعي ممكن ما تطلعش مجرد صدفة في بحر من المادة والطاقة، إنما ممكن يكون عنصر جوهري في تشكيل نسيج الواقع نفسه، من خلال الدور الفعال للمراقب في ميكانيكا الكم، والارتباط بين الوعي البيولوجي والكون الكمومي.

والتأمل ده بيدعونا لـتواضع جديد، بيعيد ترتيب مفاهيمنا حوالين الذات والكينونة، وبيدفعنا لتساؤل أكبر، وهو إزاي ممكن لوعينا القوية الخفية اللي مش قادرين نشوفها، إنها ترسم واقعنا اليومي؟

فهل إحنا كده بنكتب قصة الكون بعيوننا وأفكارنا؟ ولا إيه بظبط؟

أسئلة زي ديه بتفتح أبواب واسعة للبحث العلمي والفلسفي، وبتهيئنا لمواصلة رحلة الاستكشاف في مقالات أكتر من سلسلة “ميكانيكا الكم البيولوجية“، واللي بنحاول فيها فهم الواقع بشكل جديد مرتبط ومتأصل فينا وبوعينا.